Topics
عورتوں کو چاہئے کہ وہ دین کے احکام
اور تہذیب سیکھیں۔ اسلامی اخلاق سے آراستہ ہوں۔ ہر ممکن کوشش کریں کہ وہ ایک اچھی
بیوی اور اچھی ماں ثابت ہوں۔ خدا کی فرماں بردار بن کر اپنے فرائض بہ حسن و خوبی
انجام دیں۔
اللہ
تعالیٰ کا ارشاد ہے:
’’ایمان
والو! اپنے آپ کو، اپنے گھر والوں کو جہنم کی آگ سے بچائو۔‘‘
حضرت
عمرؓ رات کے وقت خدا کے حضور حاضر ہوتے، پھر جب سحر کا وقت آتا تو اپنی رفیقۂ
حیات کو جگاتے اور کہتے اٹھو اٹھو، نماز قائم کرو اور یہ آیت تلاوت فرماتے:
’’…اور
اپنے گھر والوں کو نماز کی تاکید کیجئے اور خود بھی اس کے اوپر پابند رہیئے۔‘‘
خواتین
کے لئے ضروری ہے کہ صفائی، سلیقہ اور آرائش و زیبائش کا پورا پورا اہتمام کریں۔
گھر کو صاف ستھرا رکھیں۔ گھر میں چیزوں کو سلیقے سے سجائیں اور سلیقے سے استعمال
کریں۔ صاف ستھرا گھر، قرینے سے سجے ہوئے صاف ستھرے کمرے، پاک صاف باورچی خانہ،
گھریلو کاموں میں سلیقہ اور سُگھڑ پن، بنائو سنگھار کی ہوئی بیوی کی پاکیزہ
مسکراہٹ سے نہ صرف گھریلو زندگی پیار و محبت اور خیر و برکت سے مالا مال ہوتی ہے
بلکہ یہ خدا کو خوش کرنے کا بھی ایک ذریعہ ہے۔
ایک
بار بیگم عثمان ابن مظعون سے حضرت عائشہؓ کی ملاقات ہوئی تو آپ نے دیکھا کہ بیگم
عثمان نہایت سادے کپڑوں میں ہیں اور کوئی بنائو سنگھار بھی نہیں کیا ہے۔ تو حضرت
عائشہؓ کو بڑا تعجب ہوا اور ان سے پوچھا۔ ’’بی بی! کیا عثمان کہیں سفر پر گئے ہوئے
ہیں؟‘‘
حضرت
عائشہؓ کے اس تعجب سے اندازہ ہوتا ہے کہ سہاگنوں کا اپنے شوہروں کے لئے بنائو
سنگھار کرنا کیسا پسندیدہ عمل ہے۔
نور نبوت
بُردباری،
تحمل اور حکمت کی روش یہ ہے کہ آدمی درگذر سے کام لے اور خدا پر بھروسہ رکھتے
ہوئے اپنی بیوی کے ساتھ خوش دلی سے نباہ کرے۔ ہو سکتا ہے کہ اللہ رب العزت اس عورت
کے ذریعے مرد کو ایسی بھلائیوں سے نواز دے جن تک مرد کی پہنچ نہ ہو۔ دین دار عورت
اپنے ایمان، سیرت اور اخلاق کے باعث پورے خاندان کے لئے رحمت بن جاتی ہے۔ اس کی
ذات سے کوئی ایسی سعید روح وجود میں آ سکتی ہے جو ایک عالم کے لئے مشعل راہ ہو۔
اچھی اور نیک خُو بیوی مرد کی اصلاح حال کے لئے ایک موثر ذریعہ ہے۔ بیوی خاوند کو
جنت سے قریب کر دیتی ہے۔ اس کی قسمت سے دنیا میں خدا مرد کو رزق اور خوش حالی سے
نوازتا ہے۔
عورت
کے کسی ظاہر عیب کو دیکھ کر بے صبری کے ساتھ ازدواجی تعلقات کو برباد نہ کیجئے
بلکہ حکیمانہ طرز عمل سے آہستہ آہستہ گھر کی مکدر فضا کو زیادہ سے زیادہ خوشگوار
بنایئے۔
رسول
اللہ صلی اللہ علیہ و سلم کا ارشاد ہے:
اگر
کسی شخص کی دو بیویاں ہیں اور اس نے ان کے ساتھ انصاف اور برابری کا سلوک نہ کیا
تو قیامت کے روز وہ شخص اس حال میں آئے گا کہ اس کا آدھا دھڑ گر گیا ہو گا۔
خوش
خلقی، نرم مزاجی کو پرکھنے کا اصل میدان گھریلو زندگی ہے۔ گھر والوں سے ہر وقت
واسطہ رہتا ہے اور گھر کی بے تکلف زندگی میں مزاج اور اخلاق کا ہر رخ سامنے آ
جاتا ہے اور یہ حقیقت ہے کہ وہی مومن اپنے ایمان میں کامل ہے جو گھر والوں کے ساتھ
خوش اخلاقی، خندہ پیشانی اور مہربانی کا برتائو رکھے۔ گھر والوں کی دل جوئی کرے
اور پیار و محبت سے پیش آئے۔
ایک
بار حج کے موقع پر حضرت صفیہؓ کا اونٹ بیٹھ گیا اور وہ سب سے پیچھے رہ گئیں۔ رسول
اللہ صلی اللہ علیہ و سلم نے دیکھا کہ وہ زار و قطار رو رہی ہیں۔ آپﷺ رُکے اور
چادر کا پلّو لے کر اپنے دست مبارک سے ان کے آنسو خشک کئے۔ رسول اللہﷺ! اپنی زوجہ
محترمہ کے آنسو پونچھتے جاتے تھے اور وہ بے اختیار ہو کر رہی رہی تھیں۔
خواجہ شمس الدین عظیمی
زیادہ منافع کمانے کے لالچ میں جو لوگ
ذخیرہ اندوزی کرتے ہیں۔ چیزوں میں ملاوٹ کرتے ہیں، غریبوں کی حق تلفی کرتے ہیں اور
مخلوق خدا کو پریشان کرتے ہیں وہ سکون کی دولت سے محروم ہو جاتے ہیں۔ ان کی زندگی
اضطراب اور بے چینی کی تصویر ہوتی ہے۔ وہ ظاہرا طور پر کتنے ہی خوش نظر آئیں، ان
کا دل روتا رہتا ہے، ڈر اور خوف سائے کی طرح ان کے تعاقب میں رہتا ہے، وہ کسی کو
اپنا ہمدرد نہیں سمجھتے اور کوئی ان کا ہمدرد نہیں ہوتا۔ جب چیزیں سستی ہوتی ہیں
تو وہ غم میں گھلتے رہتے ہیں اور جب چیزوں کے دام بڑھ جاتے ہیں تو ان کا دل باغ
باغ ہو جاتا ہے۔ اس تجارت کو کبھی ذہنوں سے اوجھل نہ ہونے دیجئے جو درد ناک عذاب
سے نجات دلانے والی ہے اور جس کا نفع فانی دولت نہیں بلکہ ہمیشہ کامرانی اور
لازوال عیش ہے۔
