Topics
انسانی زندگی کے دو رُخ ہیں۔ ایک بیداری، دوسرا
رُخ خواب۔ بیداری میں بھی اسے آرام و آسائش کے لئے وسائل کی ضرورت پیش آتی ہے اور
سونے کی حالت میں بھی۔ نیند، بیداری کی مشقت و محنت کا ثمر ہے۔ آدمی جب تھک ہار کر
اپنے اندر ضعف اور کمزوری محسوس کرتا ہے تو سونے کے بعد اس کی توانائیاں بحال ہو جاتی
ہیں۔ یہ ایک قدرتی عمل ہے کہ آدمی روحانی طور پر بیداری کی حالت سے نکل کر اس دنیا
میں پہنچ جاتا ہے جہاں وہ پیدائش سے پہلے مقیم تھا۔ نیند کی حالت میں وہ غیب کی دنیا
میں سفر کرتا ہے اور غیب کی دنیا میں نورانی لہروں کو اپنے اندر جذب کرتا ہے اور بیدار
ہونے کے بعد ایک نئی زندگی، نیا ولولہ، نیا جوش اپنے اندر موجود پاتا ہے۔
ہمارے
آقا، سرور کون و مکاں صلی اللہ علیہ و سلم کا ارشاد گرامی ہے کہ
’’بستر
پر پہنچنے سے پہلے قرآن پاک کا کچھ حصہ ضرور پڑھو تا کہ غیب کی دنیا میں داخل ہونے
سے پہلے، بیداری میں ہی انوار کا نزول شروع ہو جائے۔‘‘
نبی
مکرم صلی اللہ علیہ و سلم فرماتے ہیں:
’’جو
شخص اپنے بستر پر آرام کرتے وقت کلام اللہ کی کوئی سورہ تلاوت کرتا ہے تو خدائے تعالیٰ
بیدار ہونے تک ہر تکلیف دہ چیز سے اس کی حفاظت پر ایک فرشتہ مامور کر دیتا ہے۔‘‘
سونے
کے لئے ایسی جگہ کا انتخاب کیجئے جہاں تازہ ہوا اور آکسیجن وافر مقدار مین پہنچتی
رہے۔ ایسے بند کمرے میں نہ سوئیں جہاں تازہ ہوا کا گزر نہ ہو۔ منہ لپیٹ کر سونے سے
صحت پر بُرا اثر پڑتا ہے۔ سوتے وقت چہرہ کھلا رکھئے تا کہ تازہ ہوا ملتی رہے۔
روحانی
دنیا میں رات غیب کے شہود کا ذریعہ ہے۔ اللہ رب العزت نے اپنے محبوب صلی اللہ علیہ
و سلم سے ارشاد فرمایا ہے:
’’اے
میرے محبوبﷺ رات کو اٹھ کر قرآن پاک کی تلاوت کیجئے۔‘‘
خدا
سے تعلق پیدا کرنے اور اس میں استحکام کے لئے آخری شب میں بیدار ہو کر خود کو خدا
کی طرف متوجہ (مراقبہ) کرنا ضروری ہے۔ خدا نے اپنے دوستوں کی یہی امتیازی خوبی بیان
فرمائی ہے کہ وہ راتوں کو اٹھ کر اپنے خالق کے سامنے جھکتے ہیں، سجدہ کرتے ہیں اور
اپنی خطائوں کی معافی مانگتے ہیں۔ شب بیدار لوگوں کو اطمینان قلب کی دولت نصیب ہوتی
ہے۔ ان کے اوپر بشارت کے ذریعے آنے والی باتوں کا انکشاف ہوتا ہے۔ انہیں سچے خواب
نظر آتے ہیں۔ نبی برحق صلی اللہ علیہ و سلم کا فرمان ہے کہ
’’اب
نبوت میں سے بشارتوں کے علاوہ کچھ باقی نہیں رہا۔‘‘
لوگوں
نے پوچھا۔ ’’بشارت سے کیا مراد ہے یا رسول اللہ!‘‘
آپ
صلی اللہ علیہ و سلم نے فرمایا۔ ’’اچھا خواب۔‘‘
ہادی
برحق رحمت اللعالمین حضور اکرم صلی اللہ علیہ و سلم کا ارشاد ہے:
’’جس
شخص نے مجھے خواب میں دیکھا، اس نے واقعتاً مجھے ہی دیکھا اس لئے کہ شیطان میری صورت
میں نہیں آ سکتا۔‘‘
اللہ اور اس کے فرشتے نبی مکرمﷺ پر
درود بھیجتے ہیں، اے ایمان والو تم بھی اللہ کے محبوبﷺ پر صلوٰۃ و سلام بھیجو۔
خواجہ شمس الدین عظیمی
زیادہ منافع کمانے کے لالچ میں جو لوگ
ذخیرہ اندوزی کرتے ہیں۔ چیزوں میں ملاوٹ کرتے ہیں، غریبوں کی حق تلفی کرتے ہیں اور
مخلوق خدا کو پریشان کرتے ہیں وہ سکون کی دولت سے محروم ہو جاتے ہیں۔ ان کی زندگی
اضطراب اور بے چینی کی تصویر ہوتی ہے۔ وہ ظاہرا طور پر کتنے ہی خوش نظر آئیں، ان
کا دل روتا رہتا ہے، ڈر اور خوف سائے کی طرح ان کے تعاقب میں رہتا ہے، وہ کسی کو
اپنا ہمدرد نہیں سمجھتے اور کوئی ان کا ہمدرد نہیں ہوتا۔ جب چیزیں سستی ہوتی ہیں
تو وہ غم میں گھلتے رہتے ہیں اور جب چیزوں کے دام بڑھ جاتے ہیں تو ان کا دل باغ
باغ ہو جاتا ہے۔ اس تجارت کو کبھی ذہنوں سے اوجھل نہ ہونے دیجئے جو درد ناک عذاب
سے نجات دلانے والی ہے اور جس کا نفع فانی دولت نہیں بلکہ ہمیشہ کامرانی اور
لازوال عیش ہے۔
