دسمبر1997؁ء۔لوگوں کے اعمال

قیامت کے روز کچھ لوگ ایسے ہوں گے جو اپنی قبروں سے باہر آئیں گے اور ان کے چہرے نور سے جگمگا رہے ہوں گے۔ وہ موتیوں کے منبر پر بٹھائے جائیں گے تو لوگ ان کی شان پر رشک کریں گے۔ یہ لوگ نہ نبی ہوں گے نہ شہید……

ایک بدو نے سوال کیا۔

یا رسول اللہﷺ!

یہ کون لوگ ہیں؟ ہمیں ان کی پہچان بتا دیجئے۔

فرمایا صلی اللہ علیہ و سلم نے:

’’یہ وہ لوگ ہیں جو آپس میں محض خدا کی خاطر ایک دوسرے سے محبت کرتے ہیں۔‘‘

حضرت محمد الرسول اللہ صلی اللہ علیہ و سلم نے فرمایا:

’’خداوند قدوس کا ارشاد ہے:

مجھ پر واجب ہے کہ میں ان لوگوں سے محبت کروں جو لوگ میری خاطر آپس میں محبت اور دوستی کرتے ہیں اور میرا ذکر کرنے کے لئے ایک جگہ جمع ہو کر بیٹھتے ہیں اور میری محبت کے سبب ایک دوسرے سے ملاقات کرتے ہیں اور میری خوشنودی پانے کے لئے ایک دوسرے کے ساتھ نیک سلوک کرتے ہیں۔

اللہ کے محبوب علیہ الصلوٰۃ والسلام نے ایک رات اپنے حبیب اللہ رب العالمین کا دیدار کیا۔ اللہ نے جب اپنے محبوب سے کہا:

’’میرے محبوب مانگئے۔‘‘

اللہ کے محبوب نے یہ دعا مانگی:

’’اے اللہ!

میں تجھ سے نیک کاموں کی توفیق مانگتا ہوں اور برائیوں سے بچنے کی قوت چاہتا ہوں۔

اے اللہ!

میں تجھ سے مسکینوں کی محبت مانگتا ہوں اور یہ کہ تو میری مغفرت فرما دے اور مجھ پر رحم فرما دے۔ اور جب تو کسی قوم کو عذاب میں مبتلا کرنا چاہے تو مجھے اس سے محفوظ و مامون فرما دے اور

اے اللہ!

میں تجھ سے تیری محبت کا سوال کرتا ہوں اور اس شخص کی محبت کا سوال کرتا ہوں جو تجھ سے محبت کرتا ہے اور اس عمل کی توفیق چاہتا ہوں جو تیرے قرب کا ذریعہ بن جائے۔‘‘

حضرت محمد الرسول اللہ صلی اللہ علیہ و سلم کا ارشاد ہے:

’’لوگوں کے اعمال ہر پیر اور جمعرات کو پیش ہوتے ہیں اور لوگوں کو بخش دیا جاتا ہے سوائے اس کے جس کے دل میں اپنے مومن بھائی کی طرف سے کوئی عداوت ہو……کہا جاتا ہے کہ ان کو چھوڑ دو تا کہ یہ آپس میں صلح کر لیں۔‘‘

حضرت موسیٰ علیہ السلام نے رب ذوالجلال سے پوچھا:

’’اے میرے رب!

آپ کے نزدیک آپ کے بندوں میں کون سب سے پیارا ہے؟‘‘

رب العالمین نے جواب دیا:

’’وہ جو انتقام کی قدرت رکھنے کے باوجود معاف کر دے۔‘‘

حضرت عائشہ صدیقہؓ بیان فرماتی ہیں کہ رسول اللہﷺ نے ارشاد فرمایا:

’’اللہ کی نظر میں بدترین آدمی قیامت کے روز وہ ہو گا جس کی بدزبانی اور فحش کلامی سے لوگ اس سے ملنا چھوڑ دیں۔‘‘

دوستو! آیئے اپنی غلطیوں اور کوتاہیوں کو محسوس کریں۔ اپنی غلطیوں کا جرأت کے ساتھ اعتراف کریں۔

نمائشی عاجزی، زبانی جمع خرچ کر کے خود کو حقیر کہنا کہ صاحب میں کس قابل ہوں، میں تو بہت گنہگار ہوں۔ ارے میاں میں تو آپ کا ادنیٰ خادم ہوں۔ جھوٹی انکساری کرنا آسان بات ہے۔ لیکن اپنے اوپر اور اپنے نفس پر تنقید برداشت کرنا، اپنی کوتاہیوں کو تسلیم کرنا انتہائی مشکل کام ہے۔ بہادری یہ ہے کہ کبر و نخوت اور خود پسندی سے خود کو بچاتے رہیں اور بلاتخصیص اللہ کی مخلوق سے محبت کریں۔ ہر آدم زاد کا احترام کریں۔ اور جو اپنے لئے چاہیں وہ اپنے بھائی بہنوں کے لئے چاہیں۔

Topics

View

نورنبوت نور الٰہی-V1

خواجہ شمس الدین عظیمی

زیادہ منافع کمانے کے لالچ میں جو لوگ ذخیرہ اندوزی کرتے ہیں۔ چیزوں میں ملاوٹ کرتے ہیں، غریبوں کی حق تلفی کرتے ہیں اور مخلوق خدا کو پریشان کرتے ہیں وہ سکون کی دولت سے محروم ہو جاتے ہیں۔ ان کی زندگی اضطراب اور بے چینی کی تصویر ہوتی ہے۔ وہ ظاہرا طور پر کتنے ہی خوش نظر آئیں، ان کا دل روتا رہتا ہے، ڈر اور خوف سائے کی طرح ان کے تعاقب میں رہتا ہے، وہ کسی کو اپنا ہمدرد نہیں سمجھتے اور کوئی ان کا ہمدرد نہیں ہوتا۔ جب چیزیں سستی ہوتی ہیں تو وہ غم میں گھلتے رہتے ہیں اور جب چیزوں کے دام بڑھ جاتے ہیں تو ان کا دل باغ باغ ہو جاتا ہے۔ اس تجارت کو کبھی ذہنوں سے اوجھل نہ ہونے دیجئے جو درد ناک عذاب سے نجات دلانے والی ہے اور جس کا نفع فانی دولت نہیں بلکہ ہمیشہ کامرانی اور لازوال عیش ہے۔

SEARCH TOPICS

دسمبر1997؁ء۔لوگوں کے اعمال

Topics