Topics
س: میرے والدصاحب کو 20سال سے بلڈ پریشر ہے جب یہ ہائی ہوتا ہے تو بے ہوش ہو جاتے ہیں۔ ہوش میں آنے کے بعد ان کے جسم کا رنگ سیاہ پڑ جاتا ہے۔ والد کو دل کی کوئی تکلیف نہیں ہے۔ خون پیشاب سب ٹھیک ہے۔ شوگر بھی نہیں ہے۔ اللہ کا شکر ہے کہ اولاد بھی نہایت سعادت مند اور نیک ہے۔ سمجھ میں نہیں آتا کہ انہیں کیا تکلیف ہے۔ آپ کی مہربانی ہو گی ابا جی کے لئے علاج تجویز کر دیں۔
ج: آپ کے والد صاحب کو گیس کا عارضہ ہے۔ اس گیس ہی کی وجہ سے بلڈ پریشر کا مرض لاحق ہوا ہے۔ روحانی علاج یہ ہے کہ جب بھی پانی پئیں بارہ مرتبہ ریاحین ماء پڑھ کر پانی پر دم کر کے پئیں رنگ روشنی سے علاج یہ ہے کہ دونوں وقت کھانے سے آدھا گھنٹہ پہلے زرد شعاعوں کا پانی دو دو اونس پئیں۔
پرہیز یہ ہے:ہر قسم کی چکنائیوں سے پرہیز کریں۔ فرج میں رکھی ہوئی چیز نہ کھائیں اور گوشت کم سے کم کھائیں۔ ترکاریاں زیادہ کھائیں۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
انتساب
ہر انسان کے اوپر روشنیوں کا ایک اور جسم ہے جو مادی گوشت پوست کے جسم کو متحرک رکھتا ہے۔ اگریہ روشنیوں کا جسم نہ ہو تو آدمی مر جاتا ہے اور مادی جسم مٹی کے ذرات میں تبدیل ہو کر مٹی بن جاتا ہے۔
جتنی بیماریاں، پریشانیاں اس دنیا میں موجود ہیں وہ سب روشنیوں کے اس جسم کے بیمار ہونے سے ہوتی ہیں۔ یہ جسم صحت مند ہوتا ہے آدمی بھی صحت مند رہتا ہے۔ اس جسم کی صحت مندی کے لئے بہترین نسخہ اللہ کا ذکر ہے۔
*****
