Topics
س: آج سے بارہ سال پہلے میرے ابو فوت ہو گئے تھے۔ اس وقت سے میری امی کے سر میں درد رہتا ہے۔ شروع میں تو کبھی مہینے میں ایک بار کبھی ہفتے میں ایک دفعہ سر درد ہوتا تھا مگر اب کوئی دن نہیں گزرتا جس دن سر میں درد نہ ہو۔ مایوس ہو کر آپ کو لکھ رہی ہوں جیسے جیسے دوا کرتے ہیں مرض بڑھتا جا رہا ہے۔ ڈاکٹرز کہتے ہیں کہ غم و پریشانی کی وجہ سے درد ہوتا ہے۔ اس کا کوئی علاج نہیں ہے۔
ج: اپنی والدہ صاحبہ سے کہیں کہ رات کو سونے سے پہلے وضو کر کے گرمی ہو تو غسل کر کے آسمان کے نیچے فلیٹ میں رہائش ہو تو بالکونی میں بیٹھ کر 100بار اِنَّ اللّٰہَ مَعَ الصَّابِرِیْنَ پڑھیں اور آنکھیں بند کر کے دس منٹ کر سبز روشنی کا مراقبہ کریں۔ اس کے ساتھ ساتھ ہر نماز کے بعد 100بار اِنَّا لِلّٰہِ وَاِنِّا اِلَیْہِ رَاجِعُوْنَ پڑھ لیا کریں۔ انشاء اللہ ان کو بہت جلد سکون مل جائے گا اور سر میں درد سے نجات مل جائے گی۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
انتساب
ہر انسان کے اوپر روشنیوں کا ایک اور جسم ہے جو مادی گوشت پوست کے جسم کو متحرک رکھتا ہے۔ اگریہ روشنیوں کا جسم نہ ہو تو آدمی مر جاتا ہے اور مادی جسم مٹی کے ذرات میں تبدیل ہو کر مٹی بن جاتا ہے۔
جتنی بیماریاں، پریشانیاں اس دنیا میں موجود ہیں وہ سب روشنیوں کے اس جسم کے بیمار ہونے سے ہوتی ہیں۔ یہ جسم صحت مند ہوتا ہے آدمی بھی صحت مند رہتا ہے۔ اس جسم کی صحت مندی کے لئے بہترین نسخہ اللہ کا ذکر ہے۔
*****
