Topics
س: میں آٹھ بچوں کی ماں ہوں۔ شوہر بہت ظالم اور بے حس ہیں۔ چونکہ ایک شریف خاندان سے تعلق رکھتی ہوں اس لئے عزت کی خاطر سب کچھ برداشت کرتی چلی آئی ہوں۔ روز روز بک بک جھک جھک سے بڑی لڑکی خود سر ہو گئی ہے۔ باپ نے بچوں پر اس قدر ظلم کیا ہے کہ وہ باپ کو اپنا دشمن سمجھنے لگے ہیں۔ اب بھی جب انہیں غصہ آتا ہے تو معصوم بچوں کو اتنا مارتے ہیں کہ ان کے جسم سے خون بہنے لگتا ہے۔ میں کچھ کہتی ہوں تو مجھے بھی زد و کوب کر کے لہولہان کر دیتے ہیں۔ میں چاہتی ہوں کہ بچوں کے باپ جرمنی یا کینیڈا چلے جائیں تا کہ ہم لوگ بھی سکھ کا سانس لے سکیں۔
ج: صبح فجر کی نماز کے بعد سورج طلوع ہونے سے پہلے ایک گلاس پانی پر ایک مرتبہ یا ودود پڑھ کر دم کریں اور پانی مٹکے یا صراحی میں ڈال دیں تا کہ سب گھروالے یہ پانی پی سکیں۔ انشاء اللہ چند ہفتوں کے اس عمل سے آپ کے شوہر کے مزاج میں تبدیلی واقع ہو جائے گی اور وہ سب کے ساتھ مروت سے پیش آئیں گے
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
انتساب
ہر انسان کے اوپر روشنیوں کا ایک اور جسم ہے جو مادی گوشت پوست کے جسم کو متحرک رکھتا ہے۔ اگریہ روشنیوں کا جسم نہ ہو تو آدمی مر جاتا ہے اور مادی جسم مٹی کے ذرات میں تبدیل ہو کر مٹی بن جاتا ہے۔
جتنی بیماریاں، پریشانیاں اس دنیا میں موجود ہیں وہ سب روشنیوں کے اس جسم کے بیمار ہونے سے ہوتی ہیں۔ یہ جسم صحت مند ہوتا ہے آدمی بھی صحت مند رہتا ہے۔ اس جسم کی صحت مندی کے لئے بہترین نسخہ اللہ کا ذکر ہے۔
*****
