Topics
س: مسئلہ یہ ہے کہ میرا ایک عیسائی دوست ہے الطاف مسیح۔ آج سے چند سال پیشتر اس کو ایک ناگن نے اس وقت ڈسا جب کہ ناگن کے ملاپ کا موسم تھا۔ اس کی خوشبو بقول سپیروں کے الطاف کے جسم میں سرایت کر گئی ہے۔ اس وقت سے ہر سال الطاف کو سانپ آ کر ڈس لیتے ہیں۔ اب بھی سانپوں کے ڈسنے کا وقت تھا۔ اس نے تیس کے قریب ایسے سانپ مار دیئے ہیں جو اس پر حملہ آور ہوئے تھے اور اب چاند کی دس تاریخ کو ایک سانپ نے اسے ڈس لیا ہے۔ سپیروں کا کہنا ہے کہ اب ہر چاند کی دس تاریخ کو سانپ تمہیں ڈس لے گا۔ اس وقت اس کے منہ، ناک اور پیشاب میں خون آ رہا ہے۔ اللہ کے واسطے فوراً کوئی علاج بتائیں۔ یہ ایک انسانی زندگی کا سوال ہے۔
ج: اللہ کرے ابھی تک آپ کا دوست زندہ ہو۔ ایسا کریں کہ نیولے کا سر لے کر اپنے دوست کی پیشانی اور سر میں اس جگہ بھی ملیں جہاں سانپ نے کاٹا ہے۔ اس کے علاوہ
یَارَحِیْمُ یَااَللّٰہُ یَامُرِیْدُ
یَارَحِیْمُ یَااَللّٰہُ یَامُرِیْدُ
یَارَحِیْمُ یَااَللّٰہُ یَامُرِیْدُ
یَابَدِیْعُ الْعَجَائِبُ بِالْخَیْر یَا بَدِیْع
پڑھ کر ہر چار گھنٹے کے بعد دم کریں۔ اس علاج کے ساتھ دوسرا کوئی بھی علاج کیا جا سکتا ہے۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
انتساب
ہر انسان کے اوپر روشنیوں کا ایک اور جسم ہے جو مادی گوشت پوست کے جسم کو متحرک رکھتا ہے۔ اگریہ روشنیوں کا جسم نہ ہو تو آدمی مر جاتا ہے اور مادی جسم مٹی کے ذرات میں تبدیل ہو کر مٹی بن جاتا ہے۔
جتنی بیماریاں، پریشانیاں اس دنیا میں موجود ہیں وہ سب روشنیوں کے اس جسم کے بیمار ہونے سے ہوتی ہیں۔ یہ جسم صحت مند ہوتا ہے آدمی بھی صحت مند رہتا ہے۔ اس جسم کی صحت مندی کے لئے بہترین نسخہ اللہ کا ذکر ہے۔
*****
