Spiritual Healing
س: جناب عالی! میری بچی کو خون کی بیماری ہے۔ جہاں زخم ہو خون بند ہونے میں بہت زیادہ وقت لیتا ہے۔ گرم دوائی تو بالکل نہیں کھا سکتی۔ ناک سے نکسیر کی طرح خون شروع ہو تو کئی دن بند نہیں ہوتا۔ ہسپتال میں داخل کرنا پڑتا ہے۔ رنگ پیلا زرد ہو جاتا ہے۔ یہ بیماری اسے پیدائش کے چند دن بعد سے ہوا ہے۔ شروع میں معمولی تھی اب زیادہ ہو گئی ہے۔ بچی کے سر، پاؤں اور ہاتھ ہر وقت بہت گرم رہتے ہیں۔ ڈاکٹروں کی دوائیاں یعنی گولی، کیپسول وغیرہ کھانے سے نکسیر آ جاتی ہے یا ناک اور گلے سے خون آنے لگتا ہے۔ جسم کافی پھولا ہوا ہے۔ خون کی بہت کمی ہے۔ آپ اپنے حساب سے جو آپ کا طریقہ ہے علاج تجویز کر دیں۔
ج: سفید چینی کی پلیٹوں پر تین مرتبہ زردہ کے رنگ اور عرق گلاب سے یَابَدِیْعُ لکھ کر صبح شام بچی کو پلائیں، چالیس روز تک۔ انشاء اللہ شفا ہو گی۔ نیلی شعاعوں کا پانی تیار کریں اور دو اونس صبح اور شام پلا دیا کریں۔ آپ یہ عمل 21یوم تک کریں۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
انتساب
ہر انسان کے اوپر روشنیوں کا ایک اور جسم ہے جو مادی گوشت پوست کے جسم کو متحرک رکھتا ہے۔ اگریہ روشنیوں کا جسم نہ ہو تو آدمی مر جاتا ہے اور مادی جسم مٹی کے ذرات میں تبدیل ہو کر مٹی بن جاتا ہے۔
جتنی بیماریاں، پریشانیاں اس دنیا میں موجود ہیں وہ سب روشنیوں کے اس جسم کے بیمار ہونے سے ہوتی ہیں۔ یہ جسم صحت مند ہوتا ہے آدمی بھی صحت مند رہتا ہے۔ اس جسم کی صحت مندی کے لئے بہترین نسخہ اللہ کا ذکر ہے۔
*****
