Spiritual Healing
س: میرے گھر میں آٹھ افراد ہیں۔ آپس میں نفاق رہتا ہے۔ ہر شخص بات بے بات غصہ کرتا ہے۔ ایسا لگتا ہے کہ گھر کا ہر فرد خود کو حاکم سمجھے ہوئے ہے۔ والد والدہ کا حال یہ ہے کہ والد صاحب جیسے ہی گھر میں داخل ہوتے ہیں ان کا دماغ گھوم جاتا ہے اور لڑائی شروع ہو جاتی ہے۔ صبح ہوتی ہے تو ابا جی کو پتہ نہیں کیا ہو جاتا ہے کہ وہ والدہ کے اوپر برسنے لگتے ہیں۔ بڑے کہتے ہیں چھوٹے بہن بھائی ہمارا احترام نہیں کرتے۔ چھوٹے سہمے ہوئے رہتے ہیں اور سوچتے ہیں بڑے ہمارے سروں پر شفقت سے ہاتھ نہیں رکھتے۔
والدصاحب اب کئی کئی راتیں گھر نہیں آتے۔ والدہ کہتی ہیں کہ ان کی سسرال والوں نے جادو کرا دیا ہے کہ بہو کا گھر خراب ہو جائے اور بچوں کا مستقبل خراب ہو جائے۔
ج: والد اور والدہ دونوں ذہنی طور پر ناآسودہ ہیں۔ اس میں قصور وار دونوں ہیں۔ اس مسئلہ کو گھر کا کوئی بزرگ یا گھر کا کوئی ہمدرد دوست سلجھا سکتا ہے۔ آپ صبح کے وقت ایک مرتبہ یا ودود پڑھ کر پانی پر دم کر کے د ونوں کو پلا دیا کریں۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
انتساب
ہر انسان کے اوپر روشنیوں کا ایک اور جسم ہے جو مادی گوشت پوست کے جسم کو متحرک رکھتا ہے۔ اگریہ روشنیوں کا جسم نہ ہو تو آدمی مر جاتا ہے اور مادی جسم مٹی کے ذرات میں تبدیل ہو کر مٹی بن جاتا ہے۔
جتنی بیماریاں، پریشانیاں اس دنیا میں موجود ہیں وہ سب روشنیوں کے اس جسم کے بیمار ہونے سے ہوتی ہیں۔ یہ جسم صحت مند ہوتا ہے آدمی بھی صحت مند رہتا ہے۔ اس جسم کی صحت مندی کے لئے بہترین نسخہ اللہ کا ذکر ہے۔
*****
