Insaan Hewan Se Kyun Mumtaz He

Duniya mein hazaron insaan baste hein. Har insaan doosray ki zindagi se nawaqif he. Har insaan ki zindagi ek aisa raaz he jis ko doosray nahi jantay. Is raaz ki badolat har insaan apni ghaltion ko chupaye hue khud ko behtar paish karne ki koshish karta rehta he aur khud ko misali bana kar doosaron par zahir karna chahta he. Agar is ki ghalatiyan logon ke samnay hote toh phir woh khud ko behtar zahir karne ki koshish nah karta aur zindagi ka irtiqa bhi amal mein nahi aata. Insani saakht ki yahi khasusiyat usay janwaron se mumtaz karti he. Har ek hewan ke aamaal mutayyan hein. Hewan ke mutayyan aamaal ko har hewan ka shaoor poori tarah jaanta he chunkay janwaron mein infiradi tor par ek doosray ke darmain parda haail nahi he, aur har hewan doosray hewan ki zindagi se poori tarah waaqif he is liye koi hewan khud ko doosray hewan ke samnay misali bana kar paish nahi karta.

Kanoon:

Khud ko chhupana aur ghaltion par parda daalnay ka jazba hi insaan ko doosron se mumtaz karta he. Insani saakht ka shaoori imtiaz hi tamam uloom o fanoon ka mukhzan he. Insaan ki yeh koshish ke woh khud ko doosron ke samnay misali bana kar paish karna chahta he, is ko naye naye raston ki talaash ki taraf mael karti he. Naye naye raston ki talaash aur nayi nayi ayjadat ki koshish hi darasal insani irtiqa ka raaz he. Yahi shaoor insaan ko kainat ki doosri tamam makhlooqaat se mumtaz karti he. Yeh aisi koshish aur jad-o-jehad he jis jad-o-jehad aur koshish se woh uloom hasooli se guzar kar mawarai aalmeen mein daakhil ho jaatha he. Yahi koshish aur justojoo he jo, naye naye raston ko talaash karti he, naye naye uloom ki daagh bail daalti he. Naye naye falsafon ko kayam karti he aur naye naye falsafon se beshumar uloom ki shaakhein muratab karti he. Yeh sab irtiqai amal hein. Irtiqai amal hi ilm e hasoli ka zariya he. Lekin ilm e hasoli ke tehat jitni bhi aikthiyaraat hoti hein, woh mafrozat aur falsafon par mabni hein. Sadhu kabeer daas kehte hein:

Rangi Ko Kahen Narangi, Tinat Maal Ko Khoya.

Chalti Ko Kahen Gaadi, Dekh Kabeera Roya.

Narangi phal ka chilka, phaank, phaank ke andar goda, goday ke andar beej, beej ke andar giri, har cheez ka rang mukhtalif he. Lekin duniya walay usay narangi se mosoom karte hein. Doodh se haasil shuda johar ko khoya yani “kho diya” kaha jaatha he. Bhagat kabeer kehte hein, yeh kaisi andher nagri he jahan har cheez ko woh naam de diya gaya he jo woh nahi he.

Jab hum insani zindagi ki sakht aur irtiqa ke baarey mein soch bichaar karte hein aur kainati nizaam mein zindagi ka mutalea karte hein toh, hum yeh jaan letay hein ke har insaan doosray insaan ki zindagi se nawaqif he. Har insaan jaanta he ke, meri zindagi ke baarey mein mere ilawa doosra koi shakhs nahi jaanta. Insani zindagi ka yahi chhupa hua rukh insaan ko hewanat se mumtaz karta he. Yani insaan hewanat se is liye mumtaz he ke, hewanat mein akhfa nahi he. Is poori wazahat se yeh nateeja muratab hua ke, insaan ki khasusiyat yeh he ke, woh apni ghaltion ko chupata aur achhayiyon ko bayan karta he. Insani saakht ka yeh shaoori imtiaz hi darasal isko uloom o fanoon ki taraf mutwajjah karta he.