Aankh

Fard ki ek harkat jismani khadd-o-khaal ke saath waqay hoti he. Jismani khadd-o-khaal ke saath waqay honay wali harkat ko hum munfarid ya ikhtiyaari harkat nahi keh sakthe. Yeh harkat beharhaal kisi nah kisi harkat ke tabay he. Jismani khadd-o-khaal ke saath jo harkaat sadir hoti hein, woh tamam shaoori harkaat hein, jinko kharji zindagi kaha jaatha he. Is ke bar aks jis makhfi ehsas ke oopar jismani wajood harkat karta he, woh dakhli zindagi ya fard ka lashaoor he. Kharji aur dakhli zindagi ki misaal yeh he ke, pani ek zaroorat ya tashnagi he. Pyaas shey ka ek rukh he aur pani doosra rukh he. Pyaas rooh ki shakal o soorat aur pani jism ki shakal o soorat he. Jab hum pyaas ka tazkara karte hein toh hamaray zehan mein do rukh atay hein. Ek rukh rooh aur doosra jism. Yeh dono rukh kabhi ek doosray se judda nahi hotay. Agar duniya se pyaas ka ehsas khatam ho jaye toh pani bhi fana ho jaye ga. Pani is liye maujood heke pani ki rooh maujood he. Zindagi ka taaruf khadd-o-khaal aur naqsh o nigaar ke bagher mumkin nahi he. Zay nadki ka ek hissa khadd-o-khaal aur naqsh o nigaar par mushtamil he aur doosra hissa raftaar ke oopar kayam he.

Ek bachcha jab peda hota he, makhsoos khadd-o-khaal aur naqsh o nigaar ke saath duniya mein aata he. Unhi makhsoos khadd-o-khaal ke saath saath sattar saal zindah rehta he, naqsh o nigaar aur khadd-o-khaal mein jaisay jaisay tabdeeli waqay hoti he, jaisay jaisay kado qaamat mein izafah hota jaatha he, tabdeeli nazar aati he. Pedaish se saath sattar saal ka waqfa zahiri aankh se nazar nahi aata. Zindagi jis waqt par rawan dawaan he, jis ko shaoor din aur mah o saal mein record karta he, is ko hamari zahiri aankh nahi dekh sakti. Zindagi ka ek rukh aankhon ke samnay rehta he, aur doosra rukh aankhon se ojhal rehta he. Woh rukh jo aankhon ke samnay he aur jis mein hum naqsh o nigaar aur khadd-o-khaal ka badna ghatna dekhte hein, sab ka sab makaan (space) he aur jis khala mein yeh khadd-o-khaal ghat rahe hein aur bud rahe hein, aur jo aankhon se ojhal he, woh zaman (time) he.  Insaan jahan se aaya he anay ke baad is ka bachpan, ladakpan, jawani, budhapa ya marnay ke baad jahan chala gaya woh time he aur insaan jis tarah bachpan, jawani aur budhapay ko khadd-o-khaal ke saath mehsoos kiya woh space he.  Jab hum zaman ka tazkara karte hein toh nazriya rang o noor ke mutabiq saari kainat zamaniyaat mein ek doosray ke saath hum rishta he, aur jab hum makaniyaat ka tazkara karte hein toh, kainat noi aitbaar se aur infiradi aitbaar se alag alag he. Hum bhed, bakri, bandar, chooha, kutta aur insaan ki zindagi ka tazkara karte hein toh, zindagi aur energy sab mein mushtarik he. Jab hum noi aitbaar se kainat ka tazkara karte hein, ya space kay hudood ka tazkara karte hein, toh chooha, bandar aur haathi alag alag khadd-o-khaal mein nazar atay hein.

Takhleeqi formula yeh bana ke zindagi do rukhon par kayam he. Ek rukh zaman he aur doosra rukh makaan he. Jo ek taraf ghattha he doosri taraf badtha he aur record ho jaatha he.

Zindagi jis rukh par kayam he, sab ka sab time he.  Zindagi jis rukh par ghatt rahi he, bud rahi he, ya fanaa ho rahi he sab ka sab space he.   

Zamaniyaat ya time mein kainat ka har fard ek doosray ko pehchanta he aur ek doosray se muta-arif he. Sooraj ki misaal hamaray samnay he. Sooraj jis tarah hamari khidmat guzari mein masroof he isi tarah zameen par maujood har makhlooq ki khidmat guzari mein masroof he. Nau crore teis laakh mile ke faasle par jab hum zameen se sooraj ko dekhte hein toh, hamari nigah cover chashmi mehsoos nahi karti. Is ka mafhuum yeh he ke, jab hum apna rishta zamaniyaat se kayam kar letay hein, toh hamaray liye faasle madoom ho jaathay hein. Hamari aankh jo chund so foot se agay nahi dekh sakti nau crore tees laakh mile door dekh leti he.

Kainat mein ya afraad kainat mein taaruf ke liye jo roshni zariya ban rahi he woh azal se ek hi tarz par kayam he. Kainat ke tamam afraad ki rooh ek he; lekin jismani khadd-o-khaal alag alag hein. Jahan rooh ek he wahan har shey mein ishtiraaq he, maslan bhook bakri ko bhi lagti he, bhook insaan ko bhi lagti he, kabootar ko bhi lagti he, bhook ka lagna zamaniyaat he. Lekin infiradi tor par jab khadd-o-khaal  makaniyaat bantay hein toh ghiza alag alag ho jati he. Bhook lagna zamaniyaat par kayam he aur bhook ko mukhtalif cheezon se rafa karna space ya makaniyaat he.