کوئلے کی دلالی میں ہاتھ کالے

                                                                       تعمیل حکم سے مرید کا ذہن۔۔۔ مرشد کے ذہن میں ڈھلتا ہے یہاں تک کہ بات مرشد کے ذہن میں آتی ہے اور مرید کے ذہن میں منتقل ہو جاتی ہے۔

                                                           ایک روز فرمایا کہ سامنے والی لائٹ کھول دو۔ کمرے میں موجود تمام بٹن اس نے چیک کئے لیکن لائٹ نہیں کھلی جب کہ لائٹ کا بٹن کمرے میں تھا۔ خیال آیا کہ بلب کا کنکشن واش روم کے دروازہ کے ساتھ لگے سوئچ بورڈ کے دو بٹن میں سے ایک ہوگا لیکن یہ سوچ کر خیال کو رد کر دیا کہ واش روم کے بٹن کے ساتھ کمرے کی لائٹ کے بٹن کا کیا کام۔۔۔؟

                                                            خیال رد کیا اور آگے بڑھا ، مرشد کریم نے آواز دی اور واش روم کے بٹن کی طرف اشارہ کیا، ” وہ چیک کرو“

اس نے چیک کیا اور۔۔۔لائٹ کھل گئی۔

                                     فرمایا ، ” اپنا دماغ بھی استعمال کر لینا چاہئے  ، کیا آپ کو خیال نہیں آیا تھا۔۔؟“

                            عرض کیا، جی ! خیال آیا تھا۔

                                  فرمایا ، ” پھر۔۔۔؟“

                              عرض کیا، میں نے رد کر دیا۔

                                                فرمایا ، ” عمل کرنا چاہئے  تھا۔“

                                     غور کرنے سے ایک کے بعد ایک نکتہ اس رفتار سے ذہن میں آتا ہے کہ وہ احاطہ نہیں کر پاتا اور نہ اس مناسبت سے ذہن غور و فکر کو وقت دیتا ہے۔ خود سے کہا، دن چوبیس کے بجائے اڑتالیس گھنٹے کا ہونا چاہیئے۔ خیال بولا، چوبیس اگر اڑتالیس ہو جائے تو یہ وقت اور فاصلہ کا بڑھنا ہے، کم ہونا نہیں۔ذہن کی رفتار کا تعلق آدمی کے تقسیم کئے گئے چوبیس اور اڑتالیس گھنٹوں سے نہیں بلکہ یک سو ہونے سے ہے۔ ذہن کی رفتار بڑھ جائے تو دو گھنٹے کا کام پانچ منٹ میں ہو جاتا ہے۔

                                                     تجربہ ہے کہ ادھر اُدھر کی باتیں سوچنے سے ذہن سست ہو جاتا ہے۔ یعنی فلاں نے ایسا کیوں کہا یا میرے ساتھ ایسا کیوں ہوا۔۔جو وقت وہ محبوب کے تصور میں گزار سکتا تھا وہ غیر ضروری باتوں میں ضائع کر دیا۔ ادھر اُدھر کے خیالات سے انتشار ہوتا ہے اور ذہن کی رفتار کم ہو جاتی ہے۔ مرشد کریم اختلافات سے گریز اور معاف کرنے کی تاکید فرماتے ہیں۔

                                                 ایک صاحب سے اختلافی موضوع پر بات ہوئی ۔ دونوں کے پاس دلائل تھے اور دونوں خود کو صحیح ثابت کرنے کوشش میں تھے۔ بحث طویل ہوئی تو اچانک اپنا آپ کثیف محسوس ہوا۔ اندر میں سے آواز آئی ،” کن چکروں میں پڑ گئے۔۔؟“ جیسے ہی خیال آیا ، وہ رک گیا اور اس کے بعد ایک لفظ نہیں کہا۔ خاموش دیکھ کر مقابل کو بھی خاموش ہونا پڑا۔

                                          اتنے میں مرشد کریم نے آواز دی، کمرے میں داخل ہوا۔ سلام کے بعد انہوں نے ایک دو باتیں کیں اور پھر فرمایا۔۔ ” کوئلے کی دلالی میں ملتا کچھ نہیں ہے لیکن ہاتھ ضرور کالے ہو جاتے ہیں۔“ اس وقت تو سمجھ میں نہیں آیا کہ یہ بات کیوں کہی گئی لیکن بعد میں غور کیا اور سیاق و سباق سے کام لیا تو سخت نادم ہوا۔

                                       ادھر اُدھر کے خیالات کے بجائے جب باوقار ہستی کا خیال محیط ہوتا ہے تو ہاتھ ماہر کاتب کا قلم بن جاتا ہے۔ نکتہ در نکتہ کھلتا ہے اور خیال راسخ ہو جاتا ہے کہ جو لوگ اللہ سے واقف ہونے کے لئے جدو جہد کرتے ہیں، اللہ ان کے لئے اپنے راستے کھول دیتے ہیں۔راستہ کھلنا، زمان و مکان سے واقف ہونا ہے جب کہ پہلے سے واقف زمان و مکان کی نفی ہو جاتی ہے ۔ اسی طرح غورو فکر سے خیال در خیال آگے بڑھنے کے لئے زینہ بن جاتا ہے۔

                                                                               غور و فکر کے ضمن میں حقیقت راسخ ہوئی کہ کوئی بات سمجھ میں آجائے تو اس میں شاگرد کا کوئی کمال نہیں۔۔ جس کی تعمیل کرتے ہیں، اس کا ذہن کام کرتا ہے۔ شاگرد کا کام صرف ربط میں رہنا ہے ۔ ربط استاد سے ہٹے گا تو یقیناً کسی اور جانب ہو گا اس لئے کہ ذہن کو ہر لمحہ مرکزیت چاہیئے۔

                                              ذہن جس کو مرکز بنائے گا اس وقت وہی اس کا استاد ہے۔ دیکھنا یہ ہے کہ فرد نے مرکز کس کو بنایا ہے۔ جنت میں ذہن اللہ سے ہٹا تو نافرمانی ہو گئی۔ جب تک ذہن اللہ کی طرف ہوتا ہے، کام کیئر آف اللہ ہوتا ہے۔کائنات انسپائریشن ہے۔ ہم ہر کام انسپائر ہو کر کرتے ہیں یعنی ہم میڈیم اور خیال کے تابع ہیں۔ اطلاع کہیں اور  سے آتی ہے۔ مرزا اسد اللہ خان غالب ؔ فرماتے ہیں،

آتے ہیں غیب سے یہ مضامیں خیال میں

غالب ؔ صریرِ خامہ نوائے سروش ہے

                                                             ” قلم کے چلنے کی آواز میرے لئے غیب کی صدا ہے کہ خود بخود مضامین ذہن میں القا ہو رہے ہیں۔“

                                          ایک وقت تھا کہ وہ دنیا سے بیزار تھا۔ ایک روز مرشد کریم سے عرض کیا، صبح اٹھتا ہوں تو سینہ کے درمیان شدید قسم کی گھبراہٹ ہوتی ہے اور میں سوچتا ہوں کہ یا اللہ ! پھر صبح ہوگئی۔

                                             فرمایا،” صبح آنکھ کھلتی ہے تو پہلا ہدف وہی بنتا ہے جس طرف آدمی کا دل ہوتا ہے۔ آدمی صبح اٹھتا ہے تو تجسس ہوتا ہے۔جس کی طرف توجہ ہوتی ہے، جاگنے کے بعد پہلے اس کو دیکھتا ہے۔ جو اللہ کے طالب ہیں وہ جاگتے ہیں تو اللہ کو دیکھتے ہیں۔“

                                                       بات نے گہرا اثر کیا اور نگاہ کا زاویہ بدلنے سے دنیا بدل گئی۔ جس وقت آنکھ کھلتی ہے چاہے رات کے تین بجے ہوں، سب سے پہلے وہ مرشد کریم کو سلام کرتا ہے ۔ ابتدا میں جاگنے کے بعد ارادی طور پر انہیں یاد کیا۔ مشق سے غیر ارادی طور پر الحمد اللہ پہلا خیال صاحبِ دل کا آتا ہے اور وہ سلام عرض کرتا ہے۔ یقین ہے کہ سلام پہنچتا ہے اور جواب بھی آتا ہے۔ اللہ تعالیٰ اس کی سماعتوں کو کھول دے تا کہ وہ جواب سن لے۔

                                                                            ایک روز نیند کے اس پار مرشد کریم سے ملاقات ہوئی تو انہوں نے فرمایا ،” جب تم یہاں آئے تو تمہارا ذہن تباہی کے دہانہ پر تھا، اب تصور شیخ میں گم ہے۔“

احکم الحاکمین اللہ تعالیٰ فرماتے ہیں،

” اے ایمان والو! اللہ کے لئے تقویٰ اختیار کرو اور ڈھونڈواس تک وسیلہ۔“ ( المائدۃ :۳۵)

 کامل مرشد اللہ تک پہنچنے کا وسیلہ ہے۔

                                                                   زیادہ تر ایسی باتیں ذہن میں آتی ہیں جن کا مفہوم بہت گہرا ہوتا ہے۔ گہری باتیں عموماً کسی لفظ کی شکل میں ہوتی ہیں، توجہ نہ دی جائے تو غیر ارادی طور پر مختلف اوقات میں اس کی تکرار ہوتی ہے۔

                                                      تفکر سے گہری ہلکی ۔۔۔ ہلکی گہری تصویر بنتی ہے لیکن مفہوم کا احاطہ نہیں ہوتا ۔ یہ کیفیت دو تین گھنٹوں سے لے کر دو تین ہفتوں تک برقرار رہتی ہے۔ ذہن میں خیالات کی فلم چلتی ہے مگر مناظر کو بیان کرنے کے لئے الفاظ نہیں ہوتے۔ ہر منظر وسیع و عریض اور گہرا ہے۔ وہ جس منظر یا نکتہ میں داخل ہوتا ہے۔ کھو جاتا ہے۔ بات کھلتی نہیں ہے صرف ذہن کی سطح پر آ کر واپس گہرائی میں چلی جاتی ہے۔ اس دوران کیفیات اور تجربات بھی ملتے جلتے ہیں۔ محسوس ہوتا ہے کہ کائنات کی ہر شے خیال کو سمجھنے میں مدد کر رہی ہے۔

                                                           سبز شعاعوں کا پانی تیار کرنا تھا۔ اسٹیل کی پتیلی لی، پانی ڈالا اور آنچ دی۔ تھوڑی دیر بعد بلبلے (Bubbles)   بننا شروع ہوئے۔ نظر سطح پر ابھرتے بلبلوں پر پڑی۔ وہ متوجہ ہوا کہ دیکھے پانی میں بلبلے کس مرحلہ پر بنتے ہیں۔ یک سو ہونے سے پتیلی کی تہ میں کئی چھوٹے چھوٹے  دائرے یا بلبلے نظر آئے جو حرارت ملنے پر اوپر اٹھے اور محوری و طولانی گردش میں سطح پر پہنچے۔

                                              قابل غور بات یہ تھی کہ سطح پر نظر آنے والے بلبلوں کا تہ میں اپنے  Source  سے دائروں کی شکل میں ربط تھا جو ایک لمحہ کو بھی نہیں ٹوٹا۔ اس نے دیکھا کہ بلبلا دائروں میں اوپر کی جانب بڑھ رہا ہے۔ حیرت ہوئی کہ پانی الگ اور پانی میں موجود رہ کر بلبلا الگ ہے جب کہ دونوں پانی ہیں۔

                                                                               سوچا کہ پانی جب پانی سے ملتا ہے تو ایک ہو جاتا ہے، ان کو الگ نہیں کیا جا سکتا۔ شکل تبدیل ہونے پر شے الگ نظر آتی ہے۔ پتیلی میں جب بلبلے بنے تو بلبلے پانی تھے۔ پھر الگ کیسے ہوگئے۔۔۔؟

ابلنے کے دوران پانی تین شکلوں میں ظاہر ہوا۔ ایک خود پانی، دوسرا بلبل اور تیسرا بھاپ۔۔ سمجھ میں یہ آیا کہ تبدیلی کی وجہ حرارت اور خلا ہے۔حرارت سے خلا پیدا ہوا، شکل بدلی اور پانی ۔۔۔ پانی سے الگ نظر آیا۔ حرارت کیسے بنتی ہے، کس طرح آگے بڑھتی ہے، خلا کیسے بنتا اور پُر ہوتا اور شکل کی تبدیلی کیا ہے۔۔۔ یہ سب اپنی جگہ سوالات ہیں۔

                                                       بہرحال ، بات مفہوم میں گہرائی سے شروع ہوئی تھی۔ غور و فکر کرتے ہوئے اسی طرح اس کا ذہن آگے بڑھتا ہے، ہر شے اپنی طرف متوجہ کرتی ہے اور سب چیزوں کا تعلق اس ایک بات سے جڑ جاتا ہے جو وہ سمجھنا چاہتا ہے۔ تجربہ نے بتایا،

۱۔ جو شے سطح پر ظاہر ہوئی اس کا اپنے  Source  سے ربط تھا۔

۲۔ بلکہ اس نے دیکھا کہ سطح پر ہو بہو وہی شے ظاہر ہوئی جو  Source  میں موجود تھی یعنی بظاہر باطن کا عکس ہے۔

۳۔ یہ بات بھی سمجھ آئی کہ  نظر باطن پر ہو تو ظاہر میں وہی نظر آتا ہے جو باطن میں موجود ہے۔

                                         مشاہدہ سے سمجھا کہ مفہوم کا مکمل ادراک اس وقت ہوتا ہے جب توجہ ہر وقت  Source  کی طرف ہوتی ہے۔ ذہن میں ابھی اتنی وسعت نہیں ہے کہ خیال کو من وعن قبول کر لے، اس لئے ایک خیال کو سمجھانے کے لئے معاون خیالات آتے ہیں۔

                                                                            مرشد کریم سے تجربہ بیان کیا اور پوچھا کہ پانی کو پانی میں دیکھنا کیا ہے؟ انہوں نے آیت پڑھی،

” اللہ ہے جس نے زمین اور آسمانوں کو پیدا کیا اور آسمان سے پانی

برسایا۔ پھر اس کے ذریعہ سے تمہاری رزق رسانی کے لئے طرح

طرح کے ثمرات پیدا کئے۔“ ( ابراھیم                :                        ۳۲)

                                           فرمایا ، ” آپ کا جواب اس آیت میں ہے۔ عربی اور اردو دونوں کو سامنے رکھ کر آیت پر غور کرو۔ رزق کو اگر وسائل سمجھ لیا جائے تو بات سمجھ آجائے گی۔“