پہاڑ اڑ رہے ہیں

                                                                                                                                    زمین کے وقت کے مطابق وہ چھ گھنٹے خواب میں گزارتا ہے۔ یہاں کے چھ گھنٹے نہیں معلوم نیند کی دنیا کے کتنے ہزار سال ہیں۔ زیادہ تر وہ حصہ یاد رہتا ہے جس کا تعلق دن کے معاملات سے ہے اور اکثر وہ بھی یاد نہیں رہتا۔ خواب میں بیداری سے متعلق معاملات کی نشان دہی ہونا۔ آگے بڑھنا نہیں ہے۔ خواب کا تعلق روشنی کے زون سے ہے پھر وہ روشنی کے زون میں بیداری سے متعلق معاملات کیوں دیکھتا ہے اور وجود روشنی کے بجائے مادی شکل و صورت میں نظر آنے میں کیا راز ہے۔۔؟بیداری میں ہم دن کی دنیا اور رات میں خواب کی دنیا کا حصہ بن جاتے ہیں۔ رات میں دن کی دنیا اور دن میں رات کی دنیا غائب ہو جاتی ہے۔

                                                                                                          تفکر کے دوران سوال در سوال سے ذہن پر دباؤ بڑھتا ہے لیکن دل چسپ بات یہ ہے کہ دل مطمئن ، اندر سکوت ہوتا ہے۔ قادر و قدیر ہستی اور اس کے حکم سے مناظر قدرت معاونت کرتے ہیں اور ہر شے خود اپنا تعارف کراتی ہے۔

                                                                                                                     سکوت ایسا راستہ ہے جو پابند شعور سے آزاد شعور کی طرف متوجہ کرتا ہے۔ بندہ شعور اور لاشعور میں الٹ پلٹ ہوتا رہتا ہے۔ اس کی وضاحت اس طرح بھی ہو سکتی ہے کہ لاشعور اصل دنیا ہے جب کہ شعور عارضی اور فکشن ہے۔ زندگی کی  Base Line  ظاہر اور غیب ہے۔ ظاہر شعور اور غیب میں لاشعوری دنیا متحرک ہے۔ شعور ایسی  منزل ہے جو تغیر کے علاوہ کچھ نہیں۔ اس مثال سے بات واضح ہوتی ہے کہ پہلے بچہ کی تخلیق، بچہ کسی بھی نوع کا ہو، لاشعور میں موجود ہے۔ لاشعور مقداروں کا ذخیرہ ہے۔ اس ذخیرہ میں مقداریں زمان و مکان سے آزاد ہیں جب کہ یہی مقداریں شعور میں وجود ہیں۔

                                                                                            ذہن یک سو اور دل پُر سکون ہونے سے منظر روشن ہوا۔ ہر چیز رنگین تھی۔ رنگوں میں رنگ اس طرح مل گئے کہ کہیں یہ رنگ آبشار بن رہے تھے اور کہیں پہاڑ۔ جو رنگ پہاڑ پر تھے وہی اس پر سے بہتے آبشار میں دیکھے۔ رنگ پانی کی شکل میں تھے یا پانی رنگوں کی صورت میں تھا۔ اس نے پہاڑ کو بھی پانی دیکھا اور آبشار کو بھی۔ دونوں کی بنیاد لہریں تھیں، لہروں کی شکل و صورت ( مقداروں) میں تھوڑی تبدیلی سے پانی سے پہاڑ اور پہاڑ میں سے پانی نکل رہا تھا۔ دوسری مرتبہ پھر پہاڑ پر روشنی دیکھی جس کی لطافت اندر میں اتر گئی۔

                                                                           شہنشاہ ہفت اقلیم نانا تاج الدین ؒ فرماتے ہیں:

                                                                                                                                                                                         ” انسان کچھ نہ جاننے کے باوجود یقین رکھتا ہے کہ میں بہت کچھ جانتا ہوں۔ دن طلوع   ہوتا ہے، دن کا طلوع ہونا کیا شے ہے، ہمیں نہیں معلوم۔ طلوع ہونے کا مطلب کیا ہے ہم نہیں جانتے۔ دن رات کیا ہیں؟ اس کے  جواب میں اتنی بات کہہ دی جاتی ہے کہ یہ دن ہے، اس کے بعد رات آتی ہے۔ نوع انسانی کا یہی تجربہ ہے۔ کیا  سنجیدہ طبیعت     انسان اس جواب پر مطمئن ہو جائے گا؟“

                                                                      ذہن میں بہت سی باتیں ہوتی ہیں، لکھنے بیٹھو تو ذہن خالی ہوتا ہے۔ مرشد کریم واقف حال ہیں، ایک روز فرمایا،

”آپ کے ذہن میں باتیں بہت آتی ہیں لیکن آپ لکھتے نہیں ہیں اس لئے بھول کے خانہ میں چلی جاتی ہیں۔“ اس دن کے بعد سے جو بات جس وقت وارد ہوتی ہے، نوٹ کر لیتا ہے۔

                                                                                                                سوچ رہا تھا کہ کس طرح سمجھ میں آئے کہ طلوع کیا ہے۔ کہاں سے شروع کروں؟

                                                  خیال بولا، صفات پر غور کرو۔۔ صفات میں ذات کو تلاش کرو۔۔ صفات پر غور کرنے سے ذات کا سراغ ملتا ہے۔ سوچو کہ جب کوئی شے طلوع ہوتی ہے تو کیا ہوتا ہے۔۔؟

                                                       ذہن میں گلاب کی کلی کی تصویر آئی۔ مسندِ گل پر گل کھلا۔۔ مخملی  پتیاں ظاہر ہوئیں اور پھول جو بن پر آیا۔ کلی کا کھلنا۔ طلوع ہونا ہے۔ طلوع ہونے سے خدو خال ظاہر ہوتے ہیں۔

                                                                             خیال نے پوچھا ، خدو خال کیا ہیں؟

                                                                  اس نے کہا، شے کا زمانی اور مکانی  فاصلوں میں ظاہر ہونا خدوخال ہے۔

                                                                     خیال بولا، پھول کلی میں تھا تو کیا اس وقت ٹائم اسپیس نہیں تھے؟

                                                          اس نے کہا، ٹائم اسپیس اس وقت بھی تھے جب پھول کلی میں بند تھا۔ پتیوں میں قربت کے باوجود فاصلہ تھا لیکن پھول اور کلی کے ٹائم اسپیس میں فرق ہے۔

                                                          کیا ایک شے کے مختلف ٹائم اور اسپیس ہو سکتے ہیں؟

                                                    سوال گہرا تھا اور وہ خاموش ہو گیا۔

                                                                                                                      لاشعور نے راہ نمائی کی، ذہن میں تصویریں بنیں ، تصویروں کو دیکھا اور کہا، بیج  میں پورا پودا یا درخت موجود ہے اور یہ اس کا حقیقی ٹائم اسپیس ہے۔لیکن آنکھ بیج میں درخت اور درخت میں بیج نہیں دیکھتی۔ آنکھ ٹکڑوں میں دیکھتی ہے اور سمجھتی ہے کہ بیج کی اسپیس بڑھ رہی ہے یعنی بیج کھل رہا ہے اور پودا ، درخت بن رہا ہے اس لئےٹائم اسپیس میں فرق محسوس ہوتا ہے لیکن فرق نہیں ہے۔ درحقیقت درخت مکمل مظاہرہ کے ساتھ بیج میں ہے۔

                                                                                       کلی اور پھول کھلنے کے ٹائم اسپیس میں نظر آنے والا فرق یہ ہے کہ کلی کھلنے سے پتیوں کے درمیان فاصلہ بڑھنے سے ٹائم بڑھ جاتا ہے۔پھول بند ہوتا ہے تو پتیوں کا فاصلہ کم ہو جاتا ہے۔ کلی کی شکل میں، پھول کھلنے کا ٹائم اسپیس مغلوب ہوا۔ پھول کھلنے سے کلی کا ٹائم اسپیس مغلوب ہو گیا لیکن اس بات سے انکار نہیں کیا جا سکتا کہ پھول مکمل حالت میں کلی میں موجود ہے۔

                                                                                              کلی ڈنٹھل سے نکلتی ہے۔ بالفاظ دیگر کلی ڈنٹھل میں موجود ہے۔ اس وقت نظر آتی ہے جب طلوع ہوتی ہے۔ ڈنٹھل کی بنیاد شاخ ہے۔ ڈنٹھل شاخ کے اندر مغلوب ہے۔ شاخ تنے میں سے ظاہر ہوتی ہے، تنے میں شاخیں چھپی ہوئی ہیں۔ تنا بیج میں سے نکلتا ہے۔ بیج پودا، پھول یا درخت تفصیلات کے ساتھ موجود ہے۔ نظر اس وقت آتا ہے جب بیج کی اسپیس بڑھتی ہے۔

                                                                                          اسے لگا وہ خیال کو نہیں، اپنے آپ کو سمجھا رہا ہے۔ بھلا خیال کو سمجھانے کی کیا ضرورت ہے۔ یہ تو خیال ہے جو کھل رہا ہے اور ایک کے بعد ایک سوال کر کے اپنے اندر تصویر سے متعارف کرا رہا ہے۔ اسے محض طلوع کا خیال آیا تھا، معلوم نہیں تھا کہ خیال کھلے گا تو اس میں کائنات نظر آئے گی۔

                                                                              خود سے باتیں کرتا دیکھ کر خیال نے پوچھا ، تم نے کیا سمجھا کہ کلی کیا ہے؟

                                                  وہ بولا، پتیوں کا غیب میں جانا کلی اور نگاہوں سے اوجھل ہوجانا غیب ہے۔ نقش و نگار طلوع ہونے سے مسندِ گل پر گل کھلتا ہے۔ کلی غیب میں چلی جاتی ہے اور گلاب کا پھول تفصیلات کے ساتھ ظاہر ہوتا ہے۔ ان ساری باتوں کا نتیجہ کیا ہوا؟

                                                                                                                  وہ بولا ، شے ایک ہے۔۔ ان میں مقداروں کے ردّو بدل یا فاصلہ کم زیادہ نظر آنے سے کلی اور پھول کا فرق نظر آتا ہے۔ دن رات کی بھی یہی مثال ہے۔ اللہ دن  میں رات اور رات میں دن کو داخل کرتا ہے، دن میں سے رات کو نکالتا ہے اور رات میں سے دن کو نکالتا ہے۔ دن اور رات ایک ہیں۔ فاصلے کم سے کم ہونے سے نیند کے حواس بیدار ہوتے ہیں اور فاصلے بڑھنے سے دن کا ظہور ہوتا ہے۔

                                                                                                            شیخ کے قدموں میں بیٹھ کر وہ زندگی کے بڑے اور چھوٹے۔۔۔ جو چھوٹے نہیں بہت بڑے ہوتے ہیں، سبق سیکھتا ہے۔ خامیوں کی نشان دہی ہوتی ہے اور اللہ کی رحمت اور مرشد کی شفقت سے سوچ کا زاویہ بدلتا ہے۔

                                                                            اندر میں آواز کہتی ہے کہ سب سے پہلے خود سے انصاف کرو۔ جو خود سے انصاف کرتا ہے وہ کسی کو نقصان نہیں پہنچاتا، اسے احساس ہو جاتا ہے کہ کسی پر غصہ کرنے ، غلط سمجھنے، غلطی کا احساس ہونے پر معافی نہ مانگنے سے سب سے زیادہ نقصان اپنا ہے۔ وہ شخص ہمارے غصہ یا سوچ سے بعد میں متاثر ہوگا اور ہوگا بھی یا نہیں یہ اس کی طرزِ فکر پر منحصر ہے لیکن ردِعمل سے پہلے ہم خود عمل سے گزرتے ہیں۔ انتقام اندر سے باہر ظاہر ہوتا ہے۔

                                                                                             آواز میں دانائی ہے۔ آواز کہتی ہے کہ کسی کو نقصان نہ پہنچانے سے دل آئینہ کی طرح پاک ہوتا ہے۔ کوئی دوسرا نقصان پہنچا دے تو معاف کر دیا جائے یہ سوچ کر کہ اگر میں اس کی جگہ ہوتا تو میں کیا کرتا۔۔؟ جواب آتا ہے۔۔۔ تم بھی یہی کرتے!

                                                                                           بات یہ ہے کہ اس خاص وقت میں کون، کس جگہ پر ہے، کن حالات و واقعات سے گزر رہا ہے۔ جو جس جگہ پر ہے، وہ اس کا امتحان ہے۔ کیا ہی خوب ہو کہ درگزر سے کام لیا جائے تا کہ امتحان میں دونوں کام یاب ہوں۔ سلسلہ عظیمیہ کے قواعد و ضوابط میں شامل ہے کہ،

                                                                                                            ٭                                      تم اگر کسی کی دل آزاری کا سبب بن جاؤ تو اس سے معافی مانگ لو قطع نظر اس کے کہ وہ تم سے چھوٹا ہے یا بڑا۔ اس لئے کہ جھکنا عظمت ہے۔

                                                                                      ٭             تمہیں کسی کی ذات سے تکلیف پہنچ جائے تو اسے بلا توقف معاف کر دو۔ اس لئے کہ انتقام بجائے خود صعوبت ہے۔ انتقام کا جذبہ اعصاب کو مضمحل کر دیتا ہے۔

                                                                                                                               مرشد کریم اسّی (80)  سے زائد کتابوں اور کتابچوں کے مصنف ہیں، ہزاروں آڈیو ویڈیو خطابات اس کے علاوہ ہیں جن کا ہر لفظ اپنی جگہ کتاب ہے۔ لاکھوں خطوط کے جوابات دیئے، فلاحی کاموں کی فہرست طویل ہے اور یہ تمام سلسلے جاری ہیں۔ اللہ تعالیٰ ان کی صحت میں برکت عطا فرمائے، آمین۔ علمی مصروفیات ، مسائل کے جوابات ، ملاقاتیں، فلاحی کاموں کی نگرانی اور ان میں وسعت کے لئے کوشاں ، لوگوں کی مدد، لنگر کا انتظام ، دیگر علاقوں اور ممالک میں سلسلہ کے معاملات کی نگرانی۔۔۔ انہوں نے خود کو اللہ کے لئے وقف کر دیا ہے۔ گھر ہے، بچے ہیں لیکن مصروفیات کے باوجود سب کو وقت دیتے ہیں۔

                                                              لاشعور نے کہا، جب بندہ خود کو اللہ کے لئے وقف کر دیتا ہے تو وقت میں برکت ہو جاتی ہے۔

                                                  ایک روز عرض کیا، آپ کے لئے لکھنا چاہتا ہوں۔ دل محبت کا سمندر ہے اس کے باوجود الفاظ نہیں ملتے کہ کن لفظوں میں جذبات کا اظہار کروں۔ کیسے کہوں اور کیا بتاؤں کہ میں کیا کہنا چاہتا ہوں ۔ الفاظ کی کمی کی وجہ جذبات میں کمی ہے؟

                                                                    فرمایا ، ” جذبات میں زیادتی ہے اس لئے احاطہ نہیں ہوتا۔“

                                                                                                                            خود سے پوچھا ، محبت کیا ہے۔۔؟

                                   اندر میں سے آئی۔۔ محبت ، الحی  القیوم ہے۔۔۔ زندہ اور قائم رکھتی ہے۔ ارشاد باری ہے،

” اسی کی خلق ہے اور اسی کا امر ہے۔“     (الاعراف : ۵۴)

                                                 اس نے یہ سمجھا کہ خلق۔۔۔ معین مقداریں ہیں اور اللہ مقداروں کا خالق ہے۔ امر وہ حکم ہے جس کے تحت مقداریں قائم ہیں۔ امر کی مقدار بھی معین ہے یعنی کائنات ایک معین وقت کے لئے قائم ہے اور یہ اللہ کی مخلوق سے محبت ہے جس نے مخلوق کو زندہ رکھا ہے۔

                                                                ڈوبنا غروب اور پار، طلوع ہونا ہے۔ جو یہاں ڈوبتا ہے وہ نئی دنیا سے روشناس ہوتا ہے۔ طلوع کا مطلب یہ ہے کہ شے کہیں موجود ہے۔ وہاں سے غروب ہو کر یہاں ظاہر ہو رہی ہے ، یہاں سے غروب ہو کر وہاں ظاہر ہوتی ہے۔ غروب اور طلوع سے ٹائم اور اسپیس بدلتے ہیں۔ طلوع سے فاصلہ بڑھتا ہے، رفتار کم ہو جاتی ہے اور غروب ہونے سے رفتار بڑھتی ہے ، فاصلہ کم ہو جاتا ہے۔ جس طرح طلوع خدو خال کا ظاہر ہونا ہے، غروب خدوخال کا اوجھل ہونا ہے۔ خدوخال کا غیب میں جانا  شے  کا ختم ہونا نہیں ہے، ایک مقام سے دوسرے مقام پر ظاہر ہونا ہے۔ آفس آنے سے بندہ گھر سے غائب اور آفس میں ظاہر ہوتا ہے، گگر واپس جا کر آفس میں غائب ہو جاتا ہے۔ گھر میں گھر اور آفس میں آفس کے قوانین ( ٹائم اسپیس ) ہیں۔ آفس میں گھر کا اور گھر میں آفس کا لباس نہیں پہنتے۔ اسی طرح مادی دنیا میں لباس مٹی کا ہے، یہاں سے جانے کے بعد اور یہاں پر آنے سے پہلے روشنی لباس ہے۔