عشق سراپا یقیں ۔۔ یقیں فتحِ باب

گہری مسکراتی  آنکھیں دیکھ کر اس کے چہرہ پر مسکراہٹ بکھر گئی۔ وہ ان آنکھوں میں دیکھ نہیں سکا اور سر جھکا دیا۔ گھر جا کر ڈائری لکھتے ہوئے سوچ رہا تھاکہ مسکراہٹ کیسے بیان کرے مگر ذہن سن تھا۔ اچانک آنکھوں کے سامنے منظر روشن ہوا۔ پرنور چہرہ ، محبت سے لبریز آنکھیں اور مسکراہٹ پاکیزہ۔ محبوب حاضر۔ اور خود کو ان کے حضور پایا۔ جذبات بے تاب۔۔ دل کی دنیا زیر و زبر ہوگئی۔ نظر بھر کر دیکھنے کی کوشش کی اور تاب نہ لا کر جیسے ہی آنکھ میں حرکت ہوئی۔ وہ فاصلہ جو حذف ہو گیا تھا ایک بار پھر قائم ہوگیا لیکن احساس موجود رہا۔احساس کی موجودگی کیا ہے، یہ اپنی جگہ سوال ہے۔ وہ اکثر سوچتا ہے ایسا کیا ہو کہ مادی فاصلے حذف ہو جائیں۔ خیال کہتا ہے کہ عشق کے سوا کوئی راستہ نہیں۔ حضرت علامہ اقبال  ؒ فرماتے ہیں،

                        عشق                                            مکان                                          ومکیں                 ،                                عشق                                    زمان                                     و                          زمیں

                        عشق                               سراپا                                                 یقیں                        ،                                       اور                                     یقیں                                                     فتحِ                                      باب

اس نے دن اور رات سے متعلق سوال کیا تھا۔ منتظر تھا کہ کچھ کہیں گے اور وہ لکھے گا۔ فرمایا، ” کمال یہ نہیں ہے کہ استاد جواب بتا دے، کمال یہ ہے کہ استاد جواب تک پہنچنا سکھا دے۔ جب آدمی کسی کھوج میں نکلتا ہے تو درمیان میں بہت سے مراحل آتے ہیں اور ذہن کو جواب تک رسائی کے قابل بناتے ہیں۔ اللہ وحدہ لاشریک کا ارشاد ہے،

                ” ہم نے قرآن سمجھنا آسان کر دیا ، ہے کوئی سمجھنے والا؟“                                               ( القمر : ۱۷)

جو بندہ اللہ سے واقف ہونے کے لیے کائنات میں غور کرتا ہے اور قرآن سے راہ نمائی لیتا ہے، اللہ تعالیٰ اس کے لیے اپنے راستے کھول دیتے ہیں، اس لیے یقین کے ساتھ کوشش جاری رکھو۔“

                                                                              سونے سے پہلے آدھا گھنٹہ مختص کر کے اس نے رات اور دن سے متعلق آیات پر غور کیا۔ وہ نکات لکھے جن کو پڑھ کر ذہن ہمیشہ رکتا ہے۔ جیسے قرآن کریم میں لکھا ہے، رات بنائی کہ اس میں سکون حاصل کرو اور دن میں معاش تلاش کرو۔ اسی  طرح رات کو آرام کے لیے اور دن کو روشن بنایا تاکہ تم غور کرو۔ اکثر سوچتا تھا کہ رات کے حواس غیب سے روشناس کراتے ہیں، اللہ نے رات میں قیام اور عبادت کی تاکید فرمائی ہے پھر رات میں آرام اور دن مں کام کا مطلب کیا ہے۔۔؟ اگر آرام کا مطلب سونا ہے تو بڑے بوڑھے کہتے ہیں کہ جو سوتا ہے وہ کھوتا ہے، ایسے میں رات کے حواس سے کیسے واقف ہوا جائے۔۔۔؟ اور اگر آرام کا مطلب سونا ہے تو پھر سونا یعنی نیند اور نیند کا غالب ہونا کیا ہے۔۔۔؟   دل کبھی اس بات پر مطمئن نہیں ہوا کہ رات میں آرام یا سکون حاصل کرنے کا مطلب ساری رات سونا ہے ۔ نکات تحریر کر کے وہ سو گیا، اس ارادہ کے ساتھ کہ رات کے آخری پہر جاگ کر ذکر اور غور و فکر کرے گا۔

                                                                            اس رات وہ چھت پر سویا۔ پردہ کے اس پار بیداری میں دیکھا کہ کوئی چھت پر آتا ہے اور جس جگہ  وہ سو رہا ہے وہاں سے گزرتے ہوئے اسے دیکھ کر کہتا ہے     ” اللہ کے نیک بندے جاگ گئے ہیں، تم بھی جاگو اور اللہ کو یاد کرو۔“ یہ کہتے ہی وہ غائب ہو گیا۔ آنکھ کھلی اور وہ اٹھ کر بیٹھ گیا۔ نظر کے سامنے دور دور تک میدان۔۔ آخری حد پر پہاڑ تھے۔

                                                    صبح صادق تھی مرغ اذان دے رہا تھا۔ روشنی کی ملائم لہریں اندھیرے میں داخل ہو رہی تھیں اور تاریکی غیر محسوس رفتار سے اجالے کی طرف محوِ سفر تھی۔ ماحول نور سے معمور تھا۔۔ نور جو نگاہ کو نظر عطا کرتا ہے۔ قریب اور دور سے جانوروں کی آوازیں آرہی تھیں۔ آوازوں کی طرف متوجہ ہوا کہ آخر جانور کیا کہتے ہیں۔ دور اور قریب سے آنے والی ہر آواز اور آواز میں اتار چڑھاؤ دوسری آواز سے الگ ہے۔صبح صادق کی لہروں سے ادراک ہوا کہ حمد باری تعالیٰ بیان کی جا رہی ہے۔اس نے سوچا کہ حیوان ہم سے پہلے جاگ جاتے ہیں۔ دل چسپ بات یہ ہے کہ ان کے پاس الارم نہیں ہے لیکن وقت مقررہ پر جاگتے ہیں۔۔۔ کوتاہی نہیں ہوتی۔۔ جیسے ان کے اندر کوئی مشین یا ایسا آلہ ہے جو رات کے آخری پہر جگا دیتا ہے۔ لیکن وہ مشین آدمی کو کیوں نہیں جگاتی یا پھر آدمی اندر موجود الارم کو سنتا نہیں اور جانور سن لیتا ہے۔

                                  کوئی صبح  تو ایسی نہیں گزرتی جب ہمسایوں کے گھر میں مرغ نے علی الصبح اذان نہ دی ہو۔ اس نے سوچا ہماری اذان تو اللہ اکبر کے الفاظ سے شروع ہوتی ہے، ان کی اذان کے الفاظ کیا ہیں۔۔؟ ہم پرندوں کی زبان نہیں سمجھتے، کیا پرندے ہماری زبان میں اذان سمجھتے ہیں۔۔۔؟

        شیخ طریقت سے عرض کیا، حضور! مرغ جب اذان دیتا ہے تو کیا کہتا ہے۔۔۔؟

        مسکرائے اور فرمایا۔۔۔  ” الصلوۃ خیر من النوم!“

اسے اپنے ہاتھ پیر سن محسوس ہوئے۔ مرغ جانتا ہے کہ اللہ سے ربط قائم کرنا نیند سے بہتر ہے۔ مرغ تو نیند سے جاگ گیا پھر وہ اذان دے کر کس کو مخاطب کرتا ہے۔۔۔۔ کیا اسے معلوم ہے کہ آدمی سو رہا ہے۔۔۔ اگر معلوم ہے تو مرغ کی حیثیت  کیا ہوئی اور آدمی کس مقام پر ہے۔۔۔؟

                                                  ایسا نہیں ہے کہ وہ تفکر کے لیے صرف رات کا وقت مختص کرتا ہے۔ رات تو حواس کا نام ہے کہ جب یک سوئی ہو جائے تو دن رات کے حواس غالب ہو جاتے ہیں۔ دیگر کاموں میں مصروف رہتے ہوئے جیسے جیسے موقع ملتا ہے، دل میں آیتوں کو دہراتا ہے، کسی نکتہ پر غور کرتا ہے، مرشد کریم کی تحریریں پڑھتا ہے، ملاقات نصیب ہو تو علمی سوالات پوچھتا ہے۔ ملاقات نہ ہو سکے تو اتنا یاد کرتا ہے کہ ملاقات ہو جاتی ہے۔

                                                                                                                   یک سوئی کا تعلق باہر کی خاموشی سے اتنا نہیں ہے جتنا اندر کے سکوت سے ہے۔ آدمی جب کسی کے خیال میں ڈوب جائے تو باہر کا شور مغلوب ہو جاتا ہے اور اندر کا سکوت غالب آجاتا ہے۔

        جب اندر گہری خاموشی ہوئی تو اس نے دعا کی،

                ” پروردگار ، میرا سینہ کھول دے اور میرے کام کو میرے لیے آسان                     کردے۔“ ( طٰہ : ۲۵۔۲۶ )

دعا کرنے کے بعد ایک بار پھر غور کرنا شروع کیا کہ رات میں آرام اور سکون حاصل کرنے میں کس بات کی طرف متوجہ کیا گیا ہے۔۔۔؟

                                                                 ذہن میں جھماکا ہوا اور ” جنت کی زندگی“ کے الفاظ اسکرین پر آئے۔

                                                                                                                     لاشعور نے انسپائر کیا کہ سکون اور آرام جنت کی زندگی میں ہے جہاں وسائل کی فکر ہے نہ خوف و غم کے سائے جب کہ کام یعنی مشقت زمین پر ہے۔ رات میں بندہ جنت کے زون میں داخل ہو جاتا ہے یا جنت کے حواس غالب آجاتے ہیں جہاں ٹائم اور اسپیس ، زمین ( عالم ناسوت) سے مختلف ہے۔ یہاں سوچا، وہاں پہنچا ۔ اور سوچنا کیسا۔۔ خواب کی دنیا پر غور کریں۔ آدمی سوچتا نہیں ہے جو خیال آتا ہے اس پر عمل کرتا چلا جاتا ہے۔ نیند کی دنیا میں خیال کے آنے اور اس پر عمل کرنے میں وقت اور فاصلہ کی پیمائش ممکن نہیں ہے۔ اگر خواب میں ارادہ استعمال ہوتا تو آدمی اپنی مرضی کے خواب دیکھتا۔ جنت کی زندگی بتاتی ہے کہ سکون اور آرام خود کو سپرد کر دینے۔۔۔ اللہ کی رضا میں راضی ہونے میں ہے۔

                                                                         اللہ نے یہ بھی فرمایا ہے کہ دن میں اس کا فضل تلاش کرو۔ فضل تلاش کرنا کیا ہے۔۔؟

                                                       دن میں اس کا فضل تلاش کرو کا مطلب اس نے ایسے سمجھا کہ اب جب ہم جنت کی دنیا سے واپس ایسی دنیا میں آگئے ہیں جہاں فاصلوں میں قید ہیں اور مشقت کے بغیر کچھ نہیں ملتا تو ایسے کام کریں کہ ہمیں اس کا فضل ملے۔ فضل ملنا۔۔۔ دوبارہ جنت کی زندگی میں  داخل ہونا ہے۔ جنت کی زندگی میں داخل ہونا زمین کے ثقل سے آزاد ہونا ہے یعنی بیداری میں رہتے ہوئے جنت کی زندگی سے واقف ہو جانا۔ نوع آدم کو دنیا میں اس لئے بھیجا گیا ہے کہ وہ واپس اپنے ازلی مقام جنت کو حاصل کرے جس سے وہ نافرمانی کی وجہ سے محروم ہوا۔ نیند اور بیداری میں کتنی بڑی نشانی ہے کہ جب آدمی جاگتا ہے تو وہ جنت کے زون سے محدود زون میں داخل ہو جاتا ہے۔۔ مگر ہم غور نہیں کرتے۔

                                                  قرآن کریم معنی و مفہوم میں لامحدود ہے، غور کرنے سے باطن در باطن حقائق روشن ہوتے ہیں۔ روشن ہونے کا مطلب یہ ہے کہ جو سامنے آتا ہے وہ پہلے سے موجود ہے۔ سب کچھ اندر میں ہے۔ روشن ہونا باقی ہے ۔ بندہ جتنا غور کرے گا، تالاب کی تہ سے مزید لہریں سطح پر آئیں گی۔

                                                                                                 اس تفکر میں مصروف ایک روز مراقبہ کے بعد خیال آیا، سکون صرف اللہ کی ذات و صفات میں ہے۔ جب نیند کی دنیا، جنت کے حواس ہیں پھر پریشان خواب دیکھنا کیا ہے۔۔۔؟

                                                                                            مرشد کریم کے الفاظ ذہن میں روشن ہوئے۔۔۔ ” جنت خوشی کا مقام ہے۔ جو اس دنیا میں خوش رہنا نہیں سیکھتا، وہ یہاں سے جانے کے بعد بھی خوش نہیں رہتا۔“

                                                                       خیال نے کہا، یہ دنیا بعد کی زندگی کا عکس ہے۔ کبھی سوچا ہے کہ بندہ اللہ کے پسندیدہ کام کرتا تو خوش رہتا ہے، خواب میں نیک ارواح سے ملتا ہے اور عالمین کی سیر ہوتی ہے، انوار دیکھتا ہے اور اسرار و رموز سے آگاہ ہوتا ہے ۔ لیکن جب بیداری میں بندہ اللہ سے دور رہے اور ذہن میں انتشار ہو تو خواب بھی پراگندہ ہوتے ہیں۔

                                                                                                                   مرشد کریم رات اور دن سے متعلق تحریر لکھوا رہے تھے۔ ایک موقع پر اس آیت کا مطلب پوچھا،

                ” کیا تم دیکھتے نہیں ہو کہ اللہ رات کو دن میں داخل کرتا ہے اور دن کو

                رات میں داخل کرتا ہے۔“                                                                             ( لقمٰن                 :                            ۲۹          )

                                        عرض کیا، دونوں ایک ساتھ موجود ہیں اور ایک دوسرے سے منسلک ہیں اس طرح کہ ایک غالب ہوتا ہے تو دوسرا مغلوب ہو جاتا ہے۔ اور ان میں ربط نہیں ٹوٹتا۔

                                                                     پوچھا، ” مطلب کیا ہوا اس کا۔۔۔؟ “

سوال و جواب کی یہ ایک طویل نشست تھی لیکن بیش تر حصہ ذہن سے حذف ہو چکا ہے کیوں کہ اس دن کی ڈائری وقت پر لکھی نہیں اور اب جب وہ لکھنے بیٹھا ہے تو کچھ یاد نہیں۔ یاد ہے تو بس اتنا کہ اس نے کسی سوال کا درست جواب نہیں دیا تھا۔ پھر کچھ لوگ آگئے اور موضوع تبدیل ہوگیا۔

                                                                                جب وہ جانے لگا تو انہوں نے روکا اور اس کی نوٹ بک پر ایک ڈایا گرام بنائی۔ بتایا کہ ایک دائرہ دوسرے دائرہ میں کیسے داخل ہوتا ہے ، اس دوران مثلث  (triangle)        کیسے بنتا ہے اور مثلث کا بننا کیا ہے۔

                                                                                                                                 مراقبہ کے بعد چھت پر بیٹھا قریب و دور کے مناظر دیکھ رہا تھا۔ رات کی تاریکی میں داخل ہو کر اندر موجود روشنی سے واقف ہونا چاہتا تھا۔ ذہن میں لیل اور نہار کی آیات تھیں۔ دور پہاڑوں پر بنے گھر روشنی سے جگ مگا رہے تھے، ایسے جیسے دیئے رکھ دیئے گئے ہوں یا جگنوؤں نے پہاڑوں  کو ڈھانپ لیا ہو۔ فطرت میں موجود نظاروں میں عجیب کشش ہے۔ یہ اسے اپنی طرف ایسے کھینچتے ہیں کہ اس کے وجود کا حصہ ہوں۔ یا تو یہ نظارے اس کے اندر ہیں یا وہ ان نظاروں میں ہے اور دونوں ایک دوسرے میں جذب ہو کر اپنی تکمیل چاہتے ہیں۔

                                                                          اس نے سوچا وہ خود کون ہے۔۔؟  وہ بھی تو فطرت کا ایک نظارہ ہے۔ جیسے وہ پہاڑوں اور دریاؤں کو دیکھتا ہے، دریا اور پہاڑ بھی اسے فطرت کا حصّہ سمجھتے ہیں۔ جب وہ خود کو لوگوں سے بے گانہ کر کے قدرت کے حسین نظاروں میں گم ہوتا ہے تو کشش کی شدت اس حد تک بڑھ جاتی ہے کہ اسے مٹی کا وجود مغلوب اور اندر میں کوئی غالب محسوس ہوتا ہے۔

                                                                                     اندر میں کوئی ہے۔ اگر نہیں ہے تو موجودگی کا احساس کیا ہے۔۔؟ کیا معلوم یہی کیفیت پہاڑوں ، دریاؤں اور دیگر فطری نظاروں کی بھی ہو۔ محسوس ہوتا ہے کہ ہر وجود کا باطن دوسرے وجود کے باطن سے منسلک ہے۔ جب منسلک ہے تو ہر شے باطن میں ایک ہے، اختلاف ظاہر میں ہے یا پھر ظاہر میں بھی اختلاف نہیں۔۔ جو ہے سو نظر کا دھوکا ہے۔

آواز آئی۔۔ ساری بات یہ ہے کہ دیکھنے والا کون ہے!

                                                                                       وہ پہاڑوں پر جگنوؤں کی مانند روشن گھروں کو دیکھ رہا تھا۔ خیال آیا کہ پہاڑوں اور اس کے درمیان کم و بیش نو یا دس میل کا فاصلہ ہے۔ اگر درمیان میں کوئی شے نہیں ہے تو پھر پہاڑ ایسے کیسے نظر آرہے ہیں۔۔۔؟ اگر درمیان میں کچھ نہیں ہے تو دونوں کو ایک دوسرے میں جذب ہوجانا چاہئے  لیکن ایسا نہیں ہو رہا یا پھر بظاہر ایسا نہیں ہے۔ اگر درمیان میں ربط نہیں ہے تو وہ پہاڑ کو کیسے دیکھ رہا ہے۔۔؟

                                                                                                   فون کی مثال سے سمجھیے۔ آپ کسی کو فون کرتے ہیں۔ اگر درمیان میں سگنلز کا نظام قائم نہ ہو تو کیا کسی سے فون پر رابطہ قائم کیا جا سکتا ہے۔۔؟ لہروں کا نظام موجود ہے جس کے دوش پر دنیا کے ایک سرے سے آواز لمحہ سے بھی کم وقت میں دوسرے سرے پر پہنچ جاتی ہے۔ اسی طرح پہاڑ اور اس کے درمیان بھی ربط ہے اور اس طرح سے ہے کہ ایک لمحہ کے لیے بھی دونوں کے درمیان رابطہ نہیں ٹوٹتا۔ دل نے کہا مرشد اور مرید کا تعلق بھی ایسا ہی ہے۔                                                                                                         

                                                                                            خیال آیا۔۔ اس نے ہاتھ پپوٹے پر رکھا اور آہستہ سے اس طرح اوپر کیا کہ آنکھ آدھی بند ہو گئی۔ جیسے ہی آنکھ کی اسپیس سمٹی، دیکھا کہ پہاڑ پر روشنی کی بیم اس کی آنکھ سے ٹکرا رہی ہے یا پھر اس کی آنکھ سے روشنیاں نکل کر پہاڑ سے ٹکرا رہی ہیں۔ روشنیوں کی بیم کسی ایک سمت میں نہیں ہے۔۔ ہر سمت پھیلی ہوئی ہے۔ لیکن روشنیاں پہلے نظر کیوں نہیں آئیں۔ اس وقت نظر کیوں آئیں جب اس نے آنکھ کی اسپیس کو کم کیا۔۔؟